UMPASA MANDOK HATA SIAN NAPOSO

 

Mandok hata di loloan sian naposo

 

Mauliate ma hupasahat hami tu hamu amang raja inang soripada

Diari nauli di bulan nadenggan on, jongjong hami anakhon muna sian naposo

Di namangadopi gonghon dohot jou jouni dongan nami ia namarningot do nasida tutu di hatani natua tua namandok,

Dinaung binuat inna tutu bulu godang

baenon ma I hite hite

naung adong tutu anak magodang

Naeng ma denggan marhot ni ripe.

ia nungnga adong tutu anak magodang dijolo ni hasuhuton bolon on jala nungnga jumping na boru magodang jala nungnga denggan nasida marsiundukan dijoloni natua tua majalo ma nasida adat nagok mar ulaon lasniroha

baris baris ni gaja ma atong di rura pangaloan

molo manggokkon raja sitokka do dang oloan

ido umbaennna jong jong hami di di alaman pangantaran ni anak pangantaran ni boru, panortoran ni anak pangembasan ni boru on.

Diben I amang panggual pargossi nami

Sianjur do inn amula mula sianjur mula tompa

Mulani jolma tubu mulani jolma marroha

Molo ruam ijuk mulani ruma gorga

Mulani jolma mai marsunsang mulani udan mai marsahala

Parsarsaranni namarlundu parserahan ni jolma par aek partuhulan

Par passur sipitu mata pardolok pusuk buhit

Horbo pele pelean na amang par gonsi nami

asa marmula horas marmula gabe ma damang…..

****

Tangan do attong botohon ujung nai ma jari jari

Jari jari sampulu marsiganjang ganjang i

Atik adong pandohan nami dohot pangalakka nami nalobi hurang jumolo hami marsantabi

Tu amatta raja nang inanta soripada

Asa songon oppu raja inda inda op raja inda pati

Nahissa suruon jala nagirgir mangalapi

Napajujung jujung pinggan dihos ni matani ari

Napasahat sahat somba tu oppunta mulajadi

Asa niatuk napuran somba

Abingon ragi idup

Martinangi siboru homban

Manghorasi debata idup

Baen damang gondang somba tu omputta mulajadi

******

Jadi ima tutu dihamu nadua salhut hami dongan mu naposo

Las do rohanami di ulaon nadenggan on sai anggiat ma poda nanung jinalo mu sian bagas nabadia I partuahon onmu saleleng di ngolu muna, tung naso jadi sirang hamu tutu ia so sinirang ni hamatean, soma hamu sian haposoon hot dihatuan, sai anggiat gabe ruma tangga sitiruon tu joloan ni ari.

alai jumolo hulilit bolon hu husuhat ginjang hu

nahurang ggaram do ahu di pandaraman

hurang guru diparguruan

hurang do ahu pangajaran dang tikkos di undang undang

alai nang pe songon i namarsileonan marsijaloon do hita diangka poda ni natua tua

 

Tubu inna inggir inggir

Dilambung ni tada tada

Nga malo nian hamu marpikkir

Alai tongtong do ringkot diangka hata poda ate

Molo dung malo iba marlereng

Dang porlu be marsiajar marhonda

Molo nung malo iba marsihepeng

Dang porlu be hormat marsimatua, santabi

Molo so hormat do hamu marsimatu ninna ruma tanggai ulaon sadari

Umbahen pos rohanami nagabe pangangurhon hamu marsogot di pudina ni ari

Dang tardok dang adong nalobi hurang sogot di parrumatanggaon mu dibehen I

diho appara sidoli (tu pangoli) tung las dia sogot marmuruk ibana songon ma bahen alusmu:

tiur tiur  ni bintang idaon pane na bolon

ahu marga sihombing naburju marparsonduk bolon

dang olo ahu mallaga, ai ila do husarihon

molo tung pe ahu mallaga anju ma inang boruni raja bolon

ido sidohon mu dah,

nang di ho ito (tu namuli)

dang tardok tong adong marsogot rimas na tuho sidaohon mu songon on do

idaon Sihala bolon

unang manigor papangan ni ari

huboto daging mu ngalutan

ai nungnga loja ho massari

alai pos roham, nasinari mi

husimpan doi di lamari na hupapulik I

nungnga hubaen tu BRI

molo tung adong dope nahurang jumolo ahu marsantabi

ai ido pe natolap ahu denggan ma ahu ajari ido sidohonmu da ito

asa sai sada hamu tudolok tu toruan tubuan laklak jala tubuan sikkoru didolok ni purbatua

tubuan anak tubuan boru dongan mu saur matua. Siangkup ni hatanami dison adong huboan hami songon tanda sipalas roha, tung songon dia pe naboi hupasahat hami tung las ma rohamu manjakhon.

Jadi nuaeng pe amang pargossi

Tek inna napuran napuran si Arirang

Nalehet do attong takkinai naung martali tali dongan namion namangalilit tu hambirang

Asa sai sahat nasida hot di hatuaon dibahen I amang pande nami asa hupasahat hami ulos nami baen damang gondang hasahatan ni siboan boanon namion.

***

Jadi ima naboi hupasahat hami bah posdorahanami idaon mu doi marhite ias ni rohanami namangalehon,

Nahurang guru do ahu dipangguruan

nahu

 jadi amang raja sapala pattis inna pattis sia galangan sapala naung asi rohamu dilehon hamu dihami tikki unang baen hamu amang hami dipar alang alangan, alana marhusip sai dipangido angka iboto namion nasida naikkon marembas dohot pengantin hupinta hami gondang nami sahali nai ate amang?

Jadi nuaeng pe amang pargossi nami naeng marembas  do hami dohot dongan nami naung so sian haposoonna, nungnga jong jong udur tutu hami donganna naposo on

naung hudang hami tutu ulos namion

ai ragi hotang do diahu bintang maratur ma diboru

tinonun ni ambarita

niaithon ni anak boru

asa manumpak debata sai tubu ma ngolu ngolu

baen majo gondang siboru

opat halihon tuginjang toluhalihon tu toru.

***

Maulite ma tutu di hamu amang pargossi nami

Nungnga di oloi hamu pangidoan nami, jadi songon ima amang parjongjong nami boha amang nungnga boi hupangido hami sitio tio nami?

***

Gabe ma tutu jala horas raja nami tong do tutu pasahaton nami mauliate nungnga dibaen hamu marbunga bunga tangan nami marhite ringgit sitio suara naung pinatupa mu, songon tambani indahan nalas dohot mual sitio tio naung hupartuahon hami, nang diakka poda pe nanung pinasahat mu tuhami anakhon mu songon hatani natua tua ma namandok,

asa horbo sitikko tanduk, sisapang na walu

par butuha mangalilit, par mata mangalu alu

manggagat mai dibalian marngalu ngalu di barani jabu

saluhut poda naung hujalo sian hamu natua tua nami ampuan nami ma attong martongani jabu

indahan nalas naung naung pinatupa mu nungnga hupartuahon hami,

asa janji urat ni eme ma attong tulak lak ni simarlasuma

adat nadenggan nabinahen mu naso ra sega uhum nauli naso ra muba

asa manumpak ma omputta debata

sinur napinahan, gabe na niula,

asa binang ni sihombing

binongka tara bunga

husanggar ma apporik hulubang ma satua

horas hamu hasuhoton pardalan dalan mangomo partiga tiga

simbur magodang akka dakdanak songon ulluson pura pura

suang songon I nang namagodang sai benggeng jala saur matua

suang songon I ma nang namarhasohotan sai gabe jala maduma

asa panti bulung Sihala

landit bulung ni oppu ompu

manghorasi ma attong akka sahala

manutur nuturi sumangot ni ompu

raut manabulu take take manaba borotan

monang attong hita maralo musu dame

dame maralohon dongan

ia tinallik ma bonana ni rautan ma bulung na

nungnga denggan dipukka hami sian mulana asa uli

baenon nami pangunjuni du ujung na

amang panggual pargossi

napistar martaging na malo marsarune

tampuk ni pusu pusu urat ni ate ate

amani mallotom oppu marhulane molo dung dipaluho ula ulami halak unduk hohom mangurdot jala gale gale

asa tio ma amang songon ringgit sitio suara

tiar songong napuran tiar

rittar songon bonang ni gala

bonar songon sogum songon aek natio

tinahu ma natio I

binahen tu panuhatan

bahen damang ma sitio tio laos ima hasahan ni tortor nami mauliate ma didamang